Intendanza

Claudio Danuser es creschieu sü scu descendent d’üna famiglia da Puntraschigna in India, a Basilea ed a Berna. Grazcha als nons ho el cultivo sia relaziun cun l’Engiadina. El ho stüdgio scienzas da musica e mneder da cor / dirigent a l’Universited ed al Conservatori da Berna ed el ho stüdgio chantadur d’opera in Italia. Illa stagiun 1987/88 es el sto commember dal Internationales Opernstudio da l’Opera da Turich ed a partir da quel mumaint ho’l fat üna carriera internaziunela scu chantadur. In Grischun es el sto preschaint scu interpret da las rollas principelas da las duos operas rumauntschas «Il President da Valdei» da Robert Grossmann (Scuntrada 1988 a Scuol) ed «Il semiader» da Gion Antoni Derungs (Teater da Cuira 1996) ed el es eir sto commember da l’ensemble «Ils Trais Baritons Grischuns».

Daspö ch’el ho surpiglio dal 2002 la bachetta al cor da concerts da Richterswil e dal 2003 quella da las Swissair Voices es el activ principelmaing scu dirigent. Dal 2013 ho el dirigieu il cor dal Festival La Perla chi ho rapreschanto sülla Seebühne Pfäffikon/ZH l’opera Aida da Verdi. Dal 2018 ho el fundo il cor da belcanto Männedorf-Uetikon e dal 2019 il cor d’opera Opernchor Cantalopera. Dal 1988 al 2018 es el eir sto activ scu expert da musica tar il Pertschient da cultura da la Migros. Dal 2001 al 2003 ho el absolt ün stüdi da diplom MAS in management culturel a l’Universited da Basilea